गोरखाको गोरखकाली मन्दिरमा दर्शनार्थीको घुईचो, सुरक्षाकर्मीलाई हम्मेहम्मे

धार्मिक तथा ऐतिहासिक महत्व बोकेको गोरखकाली मन्दिरमा दर्शनार्थीको भीड लाग्न थालेको छ । भूकम्पले क्षति पुर्याएको मन्दिर पुनःनिर्माण सम्पन्न भएसँगै मन्दिरमा आउने दर्शनार्थीको सङ्ख्या पनि बढ्न थालेको कालिका मन्दिरका मूलपुजारी शारदाप्रसाद भट्टराईले जानकारी दिएका छन् ।

मन्दिरमा पूजाआजा र दर्शनका लागि गोरखासहित तनहुँ, चितवन र लमजुङलगायतका जिल्लाबाट भक्तजन गोरखकाली मन्दिर, गोरखा दरबार, गोरखानाथ गुफाका लागि आउने गरेका छन् । “यहि चैत्र १० गते शनिबार एकैदिनमा दुई हजारभन्दा बढी भक्तजन कालिका मन्दिरमा पूजापाठ तथा गोरखानाथ मन्दिरमा पूजाआजाका लागि आएका थिए”, उनले भने, ‘‘भक्तजनको बाक्लो उपस्थितिका लागि पूजापाठको व्यवस्था मिलाउन सुरक्षाकर्मीलाई हम्मेहम्मे परेको थियो ।”

शनिबार बिदाका दिन भएकाले पनि भक्तजनको भीड भएको हुनसक्ने उनको भनाइ छ । मन्दिरमा आउने अधिकांश ऐतिहासिक गोरखा दरबारको अवलोकनका लागि पनि पुग्ने गरेका छन् । भक्तजनको अत्यधिक भीडका कारण मन्दिरमा पूजा गर्न झण्डै साढे दुई घण्टाभन्दा बढी समय पालो पर्खनुपरेको सहिद लखन गाउँपालिका ७ का अमृत श्रेष्ठले बताए ।

“तलदेखि नै लामो लाइन बसेर पूजापाठ र मन्दिरको दर्शन गर्नुपर्ने अवस्था थियो”, उनले भने, “अत्यधिक भीडका कारण कतिपय भक्तजन बाहिरबाट पूजा गरेर फर्कनुपर्यो ।” मन्दिर दर्शन र पूजापाठका लागि पुगेका दर्शनार्थीका कारण दरबारको पार्किङस्थलमा सवारीसाधन पार्किङ गर्नसमेत समस्या भएको थियो ।

कोरोना सङ्क्रमणपछि सर्वसाधारणलाई मन्दिर खुला गरिएपछि शनिबार अहिलेसम्मकै धेरै भक्तजन गोरखाकाली मन्दिरमा आएको स्थानीयको भनाइ छ । कालिका मन्दिरसँगै रहेको प्रसिद्ध गोरखनाथ मन्दिर नाथ सम्प्रदायका सिद्धयोगी मानिन्छन् । गोरखनाथको नित्यपूजाको परम्परा राजा पृथ्वीपति शाहको पालादेखि सुरु भएको मानिन्छ ।

प्रकाशित मिति : १३ चैत्र २०८०,  मंगलबार  ९ : ०९ बजे

Loading...